Tig di : "Konpè, annou patajé !"
Pronmyé bagaj li fè, li tiré so pa, sa di so fanm, sa di so trwa pitit, sa di so tranmay, sa di so palank, sa di so kannon, pa so pagay ké sa di so kwi dilo.
Lò Tig fini patajé, li rété trwa poson pou Konpè Lapen. Panyen poson an té tèlman pézan, ki Tig pa té kapab lévé li.
"Souplé Konpè, idé mo mété mo panyen asou mo tèt !".
Lapen pa fè kò rèd, li idé Tig. I di Tig : "mo pòkò ka rantré, mo kouzen maryé bonmanten-an, li envité mo a so nòs".
Tig pati.
Oumf ! Oumf ! Tig pran oun lòdò. Hum ! Hum ! A pa ki bò ? Li lévé so sousi, li bay a goch, li bay a drèt. Li apèrsouvwè roun lapen rèd atè-a. Li di :
"A ! men roun lapen sou pou mouri. Li divèt soti a maryaj. Si mo panyen pa té pézan sa pézan an, mo té ké ramasé li".
Tig kontinwen so chimen. Li maché, li maché.
Mé Konpè Tig ka pasé :
"Mé non, sa mo ka wè a ? Sa ka fè dé lapen mo ka pédi. A ! si mo té pouvé idé mo panyen-an, mo té ké pran li".
"A ! non, sa fwè a mo ka mété atè. Menm si mo kasé mo kou, a pou mo ramasé sa trwa lapen-yan. A oun ti vyann mo fanm kontan !".
Konpè Tig pozé so panyen poson òbò trwazyenm lapen-an. Epi li bay viré.
Mouché alé sasé dé ròt-ya.
"Mé a kisa. Oro ! li divèt désoulé. Mo ka alé pran pronmyé-a !".
Mouché pézé dèyè pronmyé-a.
Maché, maché, pa gen pronmyé !
Konpè Tig bay déviré pran so trwazyenm lapen ké so panyen poson.
Tig lé mouri, lanmò pa lé pran li.
Lapen té ja koumansé nétwayé so poson. Li rété i di konran :
-A kimoun ?
-A mo Konpè Tig.
-A kisa ou bézwen Konpè ?
-Mo vini sasé moso difé.
-Pa rantré Konpè, pa rantré, mo fanm an chimiz dronmi ! Mo ka poté difé-a ba ou.
Enben sa jou a, tout lafanmi Tig manjé latègra.
lékri-a : Ernestine Bocage, Marie-Line Wilson, Colette Antoine-Edouard, Pauline Pindard, Louis Honorien
Desen-yan : Guy Benth
© lasosyasyon Rakaba